حاجی کیمپ سیٹھی ٹائون میں خوبرو خواتین چوروں کا نیا گروہ سرگرم ہوگیا۔ پلک جپکتے ہی گھروں میں داخل ہوکر قیمتی اشیاء لوٹنے کے بعد گونگے بہروں کا ناٹک کرکے فرار ہوجاتی ہیں ۔اہالیان علاقہ کی جانب سے بار بار شکایات کے باوجود پہاڑی پورہ پولیس ٹس سے مس نہیں ہورہی رائیڈر سکواڈ اور ابابیل فورس بھی لمبی تان کر سوگئی۔گزشتہ روز مسعود سٹریٹ کے ایک شہری کے گھر اچانک تین برقعہ پوش خواتین مکان کا دروازہ کھلا دیکھ کر داخل ہوگئیں
اور چندہی منٹوں میں موبائل فون اور قیمتی اشیاء چوری کرکے فرار ہورہی تھیں کہ مکان مالک اور محلے کے لوگوں کی جانب سے آواز کسنے پر ڈکیت گروپ سے اپنی چیزیں برآمد کرکے اسکی اطلاع فوری پہاڑی پورہ پولیس کو دی تاہم پولیس نے روایتی حربے استعمال کرتے ہوئے سائل کویہ کہہ کر ٹال دیا کہ ملزمان کی گرفتاری کی پوری کوشش کرینگے اہالیان علاقہ کے مطابق پہاڑی پورہ پولیس کے پاس 32 ابابیل فورس ،تین رائیڈر، دوپولیس موبائل کے ہوتے ہوئے علاقے میں پولیس کا کوئی اہلکار نظر نہیں آتا اور آئے روز موبائل سنیچنگ اور دیگر وارداتیں معمول بن چکی ہیں
