سہہ فریقی ٹی20سیریز : پاکستان کی آسٹریلیا کو45رنز سے شکست

سہہ فریقی ٹی20سیریز : پاکستان کی آسٹریلیا کو45رنز سے شکست

 ویب ڈیسک:زمبابوے کے شہر ہرارے میں سہ فریقی ٹی ٹوئنٹی سیریز کے پانچویں میچ میں پاکستان نے آسٹریلیا کو 45 رنز سے شکست دے دی۔
تفصیلات کے مطابق سہ ملکی ٹی 20 سیریز کے پانچویں میچ میں پاکستان نے آسٹریلیا کو 45 رنز سے شکست دیدی، پاکستان کے 195 رنز کے ہدف کے تعاقب میں آسٹریلیا کی جانب سے اننگز کا آغاز ایرون فنچ اور آرسی شارٹ نے کیا۔ دونوں اوپنرز پراعتماد آغاز فراہم کرنے میں ناکام رہے اور صرف 29 کے مجموعی اسکور پر ایرون فنچ 16 رنز بناکر آؤٹ ہوگئے، تیسرے نمبر پر آنے والے کھلاڑی مائیکل ہیڈ بھی صرف 7 رنز بناکر آؤٹ ہوگئے جب کہ گلین میکس ویل کو شاہین آفریدی نے ایل بی ڈبلیو کیا، انہوں نے صرف 10 رنز بنائے۔

اوپنر آرسی شارٹ نے مزاحمت کی کوشش کی تاہم پاکستانی بولرز کی شاندار بولنگ کے باعث وہ بھی 28 رنز بناکر آؤٹ ہوگئے، آسٹریلیا کی جانب سے الیکس سرے نے سب سے زیادہ 37 رنز کی ناقابل شکست اننگز کھیلی تاہم وہ ٹیم کو میچ جتوانے میں ناکام رہے۔ آسٹریلیا کی ٹیم مقررہ اوورز میں 7 وکٹوں کے نقصان پر صرف 149 رنز ہی بناسکی۔

 پاکستان کی جانب سے شاہین شاہ آفریدی نے زبردست بولنگ کا مظاہرہ کرتے ہوئے  3 وکٹیں حاصل کیں جب کہ محمد عامر، فہیم اشرف، شاداب خان اور عثمان خان نے ایک ایک وکٹ حاصل کی۔

اس سے قبل آسٹریلیا نے پاکستان کے خلاف ٹاس جیت کر پہلے فیلڈنگ کا فیصلہ کیا تو پاکستان کی جانب سے اننگز کا آغاز حارث سہیل اور فخرزمان نے کیا تاہم حارث سہیل بغیر کوئی رن بنائے دوسرے اوور میں آؤٹ ہوگئے جب کہ فخرزمان نے جارحانہ اننگز کا مظاہرہ کرتے ہوئے 42گیندوں پر 73 رنز سکور کیے، فخرزمان کا ساتھ تیسرے نمبر پر آنے والے حسین طلعت نے دیا اور 30 رنز کی اننگز کھیلی تاہم 80 کے مجموعی اسکور پر وہ آؤٹ ہوگئے۔

کپتان سرفراز احمد زیادہ دیر آسٹریلوی بولرز کا مقابلہ نہ کرسکے اور صرف 14 رنز بناکر آؤٹ ہوگئے تاہم شعیب ملک اور آصف علی نے جارحانہ انداز اپنایا، شعیب ملک نے 15 گیندوں پر 27 جب کہ آصف علی نے 18 گیندوں پر 37 رنز کی اننگز کھیلی جس کی بدولت قومی ٹیم نے مقررہ اوورز میں 7 کھلاڑیوں کے نقصان پرآسٹریلیا کو  194 رنز کاہدف دیا۔

متعلقہ خبریں