Daily Mashriq

خیبر ایجنسی: خاصہ دار فورس کے اہلکار کی ہلاکت کے بعد پاک افغان شاہراہ بند

خیبر ایجنسی: خاصہ دار فورس کے اہلکار کی ہلاکت کے بعد پاک افغان شاہراہ بند

پاکستان کے قبائلی علاقے خیبر ایجنسی میں حکام کا کہنا ہے کہ سکیورٹی فورسز پر ہونے والے ایک حملے میں خاصہ دار فورس کے ایک اہلکار ہلاک اور تین ایف سی اہلکار زخمی ہوگئے ہیں۔

اس واقعے کے بعد سکیورٹی فورسز نے علاقے میں کرفیو نافذ کرکے خیبر ایجنسی سے گزرنے والی پاک افغان شاہراہ ہر قسم کے ٹریفک کے لیے بند کر دی ہے۔

پولیٹکل انتظامیہ خیبر کے ایک اہلکار نے بی بی سی کو بتایا کہ یہ حملہ سنیچر اور اتوار کی درمیانی شب پشاور شہر سے متصل خیبر ایجنسی کے علاقے جمرود میں تختہ بیگ کے مقام پر پیش آیا۔

انھوں نے کہا کہ مسلح شدت پسندوں نے پولیٹکل انتظامیہ اور ایف سی کی مشترکہ چیک پوسٹ پر راکٹ لانچروں سے حملہ کردیا جس سے وہاں ڈیوٹی پر موجود خاصہ دار فورس کے ایک اہلکار موقع ہی پر ہلاک ہوئے جبکہ ایف سی کے تین اہلکار زخمی ہوئے۔

انھوں نے کہا کہ سکیورٹی فورسز نے اتوار کی صبح سے جمرود تحصیل اور آس پاس کے علاقوں میں کرفیو نافذ کرکے وسیع پیمانے پر سرچ آپریشن کا آغاز کردیا ہے۔

پولیٹکل انتظامیہ خیبر کے اہلکار کے مطابق آپریشن کے باعث خیبر ایجنسی سے گزرنے والی پاک افغان شاہراہ ہر قسم کے ٹریفک کےلیے بند کردی گئی ہے۔

متعلقہ خبریں