Daily Mashriq

شمالی کوریا نے سائبر حملوں سے 2 ارب ڈالر بٹور لئے، اقوام متحدہ

شمالی کوریا نے سائبر حملوں سے 2 ارب ڈالر بٹور لئے، اقوام متحدہ

اقوام متحدہ نے اپنی نئی رپورٹ میں انکشاف کیا ہے کہ شمالی کوریا نے بین الاقوامی سطح پر مختلف بینکوں اور کرپٹو کرنسی کی تجارت کرنیوالے اداروں پر بڑے سائبر حملے کرکے اپنے ہتھیاروں کے پروگرام کیلئے 2 ارب ڈالر بٹورے۔

 غیر ملکی میڈیا کے مطابق عالمی ادارے کی سلامتی کونسل کی ایک نئی رپورٹ میں بتایا گیا ہے کہ کمیونسٹ شمالی کوریا گزشتہ کافی عرصے سے اپنے ہتھیاروں کے پروگرام کیلئے مالی وسائل اپنے ہیکرز کی طرف سے بیرون ملک سائبر حملوں کے ذریعے حاصل کرتا آیا ہے، ان حملوں میں ناصرف بڑے بڑے بینکوں کے آن لائن نظاموں کی ہیکنگ کی گئی بلکہ اس دوران بہت مہنگی کرپٹو کرنسی کی تجارت کرنیوالے کاروباری اداروں کو بھی نشانہ بنایا گیا۔

 رپورٹ کے مطابق یہ حملے ناصرف بہت ہی جدید اور 'اسٹیٹ آف دی آرٹ‘ انداز میں کئے گئے بلکہ ان کا بروقت پتہ چلانا اب تک اس لئے بھی بہت مشکل ہے کہ ایسی کارروائیاں اور بھی زیادہ منظم اور نپے تلے طریقے سے کی جانے لگی ہیں۔

 یہ رپورٹ غیر جانبدار بین الاقوامی ماہرین کے ایک گروپ نے سلامتی کونسل کیلئے تیار کی ہے، جس میں یہ جائزہ لیا گیا ہے کہ پیانگ یانگ نے گزشتہ 6 ماہ کے دوران اقوام متحدہ کی عائد کردہ بین الاقوامی پابندیوں کا کس حد تک احترام کیا۔

متعلقہ خبریں