Daily Mashriq

وزیر خارجہ قریشی سے نئے ایرانی سفیر کی ملاقات، خطے کی صورتحال پر غور

وزیر خارجہ قریشی سے نئے ایرانی سفیر کی ملاقات، خطے کی صورتحال پر غور

اسلام آباد: وزیر خارجہ شاہ محمود قریشی سے نئے ایرانی سفیر سید محمد علی حسینی کی ملاقات ہوئی، وزیر خارجہ نے کہا کہ خطے میں بڑھتی ہوئی کشیدگی کسی کے مفاد میں نہیں۔

تفصیلات کے مطابق وزیر خارجہ شاہ محمود قریشی سے نئے ایرانی سفیر سید محمد علی حسینی کی ملاقات ہوئی۔ ملاقات وزیر خارجہ کے چیمبر، پارلیمنٹ ہاؤس میں ہوئی۔

ملاقات میں ایران امریکا کشیدگی اور خطے کی صورتحال پر تبادلہ خیال کیا گیا۔ وزیر خارجہ شاہ محمود قریشی نے بطور سفیر تعیناتی پر سید محمد علی حسینی کو مبارک باد دی۔

وزیر خارجہ شاہ محمود قریشی کا کہنا تھا کہ پاکستان اور ایران کے تاریخی، مذہبی و کثیر الجہتی برادرانہ تعلقات ہیں۔ انہوں نے ایرانی سفیر سے کہا کہ توقع ہے آپ جیسے منجھے ہوئے سفارتکار کی تعیناتی سے تعلقات مستحکم ہوں گے۔

وزیر خارجہ نے مزید کہا کہ خطے میں بڑھتی ہوئی کشیدگی کسی کے مفاد میں نہیں، پاکستان کشیدگی کم کروانے کے لیے مثبت کردار ادا کرنے کے لیے پر عزم ہے۔

انہوں نے کہا کہ خطے کے مختلف وزرائے خارجہ سے رابطے میں ہوں، وزیر اعظم کی ہدایت پر جلد ایران سمیت اہم ممالک روانہ ہو رہا ہوں۔

ملاقات میں ایرانی سفیر نے تعلقات کو مزید وسعت دینے کے لیے بہترین کاوشیں بروئے کار لانے کی یقین دہانی بھی کروائی۔

یاد رہے کہ وزیر اعظم عمران خان نے چند روز قبل، ایران امریکا کشیدگی کے بعد وزیر خارجہ شاہ محمود قریشی کو ایران، امریکہ اور سعودی عرب کے دورے کی ہدایت کی تھی۔

وزیر اعظم عمران خان نے آرمی چیف جنرل قمر جاوید باجوہ کو بھی متعلقہ ممالک کے فوجی سربراہان سے رابطوں کی ہدایت کی تھی۔

وزیر اعظم نے کہا تھا کہ وزیر خارجہ اور آرمی چیف واضح پیغام دیں کہ پاکستان اب کسی جنگ کا حصہ نہیں بنے گا، پاکستان امن کے لیے کردار ادا کرنے کو تیار ہے۔

متعلقہ خبریں