Daily Mashriq


بھارت ریاستی انتخابات :نریندر مودی کی انتہا پسندی بی جے پی کو لے ڈوبی

بھارت ریاستی انتخابات :نریندر مودی کی انتہا پسندی بی جے پی کو لے ڈوبی

ویب ڈیسک:بھارت کی 5 ریاستوں میں ہونے والے انتخابات میں وزیراعظم نریندر مودی کی جماعت بھارتیہ جنتا پارٹی (بی جے پی) کو ایک بڑے اپ سیٹ کا سامنا ہے، 3 ریاستوں میں کانگریس جبکہ دیگر 2 ریاستوں میں مقامی جماعتیں آگے ہیں۔

بھارتی ریاست چھتیس گڑھ میں کانگریس نے واضح برتری حاصل کر لی ہے جبکہ راجستھان میں بھی کانگریس ہی آگے ہے۔ مدھیہ پردیش میں دونوں جماعتوں کے درمیان کانٹے کا مقابلہ چل رہا ہے۔ ان تینوں ریاستوں میں بھارتیہ جنتا پارٹی (بی جے پی) کی حکومت تھی۔ چھتیس گڑھ میں کانگریس 59 نشستوں پر آگے ہے جبکہ بی جے پی کے امیدوار 23 نشستوں پر سبقت لیے ہوئے ہیں۔

بی بی سی کی رپورٹ کے مطابق راجستھان میں کانگریس کے امیدوار 96 نشستیں جیت رہے ہیں جبکہ بھارتیہ جنتا پارٹی کے امیدوار 75 حلقوں میں ہی بازی مارتے دکھائی دے رہے ہیں تاہم یہاں واضح اکثریت نہ ملنے کی صورت میں چھوٹی جماعتوں اور آزاد امیدوار حکومت سازی میں اہم کردار ادا کرتے دکھائی دے رہے ہیں۔

مدھیہ پردیش میں صورتحال تیزی سے بدلی ہے۔ ابتدا میں یہاں کانگریس آگے تھی، پھر بی جے پی نے سبقت لی اور اب پھر کانگریس آگے نکل گئی ہے۔ اس وقت کانگریس یہاں 113 نشستیں جیت رہی ہے جبکہ بی جے پی 106 نشستوں پر آگے ہے۔ بہوجن سماج پارٹی چار نشستوں پر آگے ہے اور اس نے کانگریس کی حمایت کا اعلان کر دیا ہے۔ خیال رہے کہ اس ریاستی اسمبلی میں سادہ اکثریت کے لیے 115 نشستیں درکار ہیں۔

تیلنگانہ میں ٹی آر ایس 87 نشستوں پر آگے ہے جو دو تہائی کی برتری سے بھی زیادہ ہے۔ 40 نشستوں والی ریاست میزورم میں ایم این ایف جیت کی طرف بڑھ رہی ہے اور وہ 16 نشستیں جیت چکی ہے اور سات پر آگے ہے۔

مدھیہ پردیش اور چھتیس گڑھ میں بی جے پی 15 برس سے اقتدار میں تھی جبکہ راجستھان میں وہ پانچ برس قبل اقتدار میں آئی تھی۔ ان ریاستوں میں وزیراعظم نریندر مودی اور کانگریس کے صدر راہول گاندھی نے انتخابی مہم میں بڑھ چڑھ کر حصہ لیا تھا۔

بی جے پی کے اقتدار والی دو ریاستوں میں کانگریس کی ممکنہ جیت کو ملک کی قومی سیاست میں اس کی موثر واپسی سے تعبیر کیا جا رہا ہے۔

متعلقہ خبریں