Daily Mashriq


پاکستانی ہارر فلم ’کتاکشا‘ بین الاقوامی نمائش کیلئے منتخب

پاکستانی ہارر فلم ’کتاکشا‘ بین الاقوامی نمائش کیلئے منتخب

تجسس اور خوف سے بھرپور پاکستانی ہارر فلم ’ کتاکشا‘ کو رواں برس اگست میں لندن فرائٹ فیسٹ فلم فیسٹیول میں پیش کیا جائے گا۔

پاکستان سنیما ڈاٹ نیٹ کی رپورٹ کے مطابق اس فلم کی ہدایات پاکستانی فلم ساز ابو علیحہ نے دی ہیں، یہ کم بجٹ میں بنائی گئی ڈراؤنی فلم ہے جو چکوال میں واقع کٹاس راج مندر پر مبنی ہے۔

فلم کی تفصیلات تاحال بیان نہیں کی گئی لیکن اہم بات یہ ہے کہ یہ بین الاقوامی شائقین، انویسٹرز کے لیے پیش کی جائے گی جو نئے ٹیلنٹ کی تلاش میں رہتے ہیں۔

کتاکشا فلم میں سلیم معراج، مبین گبول، قاسم خان اور کرن تعبیرر مرکزی کرداروں میں دکھائی دیں گے جسےرواں برس اگست میں لندن فرائٹ فیسٹ فلم فیسٹیول میں اسکریننگ کے لیے پیش کیا جائے گا۔

دنیا کا سب سے بڑا ہارر فلم فیسٹیول برطانیہ میں منعقد ہوتا ہے جس میں دنیا بھر کے فلم ساز اپنی ہارر فلمیں نمائش کے لیے پیش کرتے ہیں۔

فیسٹیول میں منتخب فلموں کو نہ صرف صرف ایوارڈز و کیش انعامات سے نوازا جاتا ہے بلکہ فلم کی انٹرنیشنل ریلیز کے بھی قوی امکانات ہوتے ہیں کیونکہ دنیا بھر کی بڑی فلم پروڈکشنز کمپنیوں کے نمائندے بھی اس فیسٹیول میں شریک ہوتے ہیں۔

’کتاکشا ‘ فلم کے لکھاری اور ہدایت کار نے تصدیق کی ہے کہ لندن فرائٹ فلم فیسٹیول سے خط و کتابت کئی ماہ سے جاری تھی۔

انہوں نے کہا کہ کتاکشا کو فیسٹیول میں منتخب ہونے کے لیے بھجوایا تھا جہاں سے تصدیقی ای میل آگئی ہے، فلم کو اگست میں منعقد ہونے والے فیسٹیول میں دکھایا جائے گا۔

رواں سال اس فلم کا پہلا لک سامنے لانے کے لیے مداحوں کے ساتھ ایک ویڈیو شیئر کی گئی تھی، جس میں دکھایا گیا تھا کہ چند نوجوان ایک گاڑی میں بیٹھ رہے ہیں جہاں سے ان کے سفر کا آغاز ہوگا۔

جبکہ اب اس نئے ٹیزر میں دکھایا گیا کہ یہ نوجوان ایک سفر پر نکلتے ہیں، جس کے بعد یہ کسی انجان جگہ پہنچ جاتے ہیں اور وہاں ان کے ساتھ عجیب واقعات ہونا شروع ہوجاتے ہیں۔

یاد رہے کہ یہ ابو علیحہ کی دوسری فلم ہے، اس سے قبل وہ ’عارفہ‘ نامی فلم بنا چکے ہیں جو کراچی کی لڑکی کی زندگی سے متاثر ہوکر بنائی گئی تھی۔

خیال رہے کہ ہدایت کار کا اس سے قبل اپنی فلم کے حوالے سے کہنا تھا کہ انہیں اس فلم بنانے میں پہلی فلم ’عارفہ‘ بنانے سے بھی زیادہ مسائل کا سامنا کرنا پڑا۔

متعلقہ خبریں