Daily Mashriq

’ایل او سی پر اقوام متحدہ کے مبصرین کی نگرانی کا طریقہ کار مزید مضبوط بنایا جائے‘

’ایل او سی پر اقوام متحدہ کے مبصرین کی نگرانی کا طریقہ کار مزید مضبوط بنایا جائے‘

پاکستانی مندوب کے مطابق بڑھتی ہوئی بھارتی اشتعال انگیزی میں مبصر گروپ کا کردار مزید اہم ہوگیا ہے— فوٹو بشکریہ ٹوئٹر

پاکستان نے بھارتی جارحیت اور مقبوضہ کشمیر کی کشیدہ صورتحال کے پیش نظر اقوام متحدہ کے مبصر گروپ برائے پاکستان و بھارت (یو این ایم او جی آئی پی) اور اس کی نگرانی کے طریقہ کار کو مزید مضبوط بنانے کا مطالبہ کردیا۔

اقوام متحدہ میں پاکستان کی مستقل مندوب ڈاکٹر ملیحہ لودھی نے سلامتی کونسل میں امن مشنز کی کارکردگی پر مباحثے کے دوران یہ مطالبہ کیا۔

ملیحہ لودھی کا کہنا تھا کہ یو این ایم او جی آئی پی کو لائن آف کنٹرول (ایل او سی) پر بھارتی اشتعال انگیزیوں کی نگرانی کا طریقہ کار مزید سخت کرنا چاہیے۔

پاکستانی مندوب کا کہنا تھا کہ نئی دہلی کی جانب سے 5 اگست کو مقبوضہ کشمیر کی خصوصی حیثیت ختم کرنے کے بعد بڑھتی ہوئی بھارتی اشتعال انگیزی میں مبصر گروپ کا کردار مزید اہم ہوگیا ہے۔

ان کا یہ بھی کہنا تھا کہ سلامتی کونسل کو اس گروپ کی رپورٹنگ کی ذمہ داریوں میں ابھی اضافہ کرنا چاہیے۔

انہوں نے اقوام عالم کو باور کروایا کہ یو این ایم او جی آئی پی کی میزبانی کی حیثیت سے پاکستان اس کی افادیت سے اچھی طرح واقف ہے۔

ڈاکٹر ملیحہ لودھی نے خطے میں امن کو برقرار رکھنے میں اقوام متحدہ کے مبصر گروپ کے کردار کی تعریف بھی کی۔

متعلقہ خبریں