Daily Mashriq

آرمی چیف کی سعودی فوجی مشیر سے ملاقات، علاقائی سیکیورٹی پر تبادلہ خیال

آرمی چیف کی سعودی فوجی مشیر سے ملاقات، علاقائی سیکیورٹی پر تبادلہ خیال

راولپنڈی: سعودی وزیر دفاع کے فوجی مشیر میجر جنرل عبداللہ العتیبی نے آرمی چیف جنرل قمر جاوید باجوہ سے جنرل ہیڈ کوارٹر (جی ایچ کیو) میں ملاقات کی۔

پاک فوج کے شعبہ تعلقات عامہ (آئی ایس پی آر) کے جاری کردہ بیان کے مطابق ملاقات میں باہمی دلچسپی کے امور، علاقائی سیکیورٹی اور تربیتی تبادلوں کے پروگرام سمیت مشترکہ دفاعی تعاون کو مزید فروغ دینے کے لیے اقدامات پر بات چیت کی گئی۔

اس موقع پر آرمی چیف نے رائل سعودی لینڈ فورس کی صلاحیتوں میں اضافے کے لیے تعاون کی یقین دہانی کروائی۔

آئی ایس پی آر کا کہنا تھا کہ ملاقات کرنے والی سعودی شخصیت نے علاقائی امن اور استحکام کے لیے پاک فوج کی قابلِ قدر خدمات کا اعتراف کیا۔

اس ملاقات میں پاکستان میں سعودی سفیر نواف سعید المالکی بھی مووجود تھے۔

قبل ازیں آرمی چیف نے ایبٹ آباد میں آرمی میڈیکل سینٹر (اے ایم سی) کا دورہ کیا جہاں لیفٹننٹ جنرل خاور رحمٰن نے اے ایم سی کے کرنل کمانڈنٹ کے فرائض سنبھالے۔

آئی ایس پی آر کے مطابق اس موقع پر ریٹائر ہونے والے کرنل کمانڈنٹ لیفٹیننٹ جنرل زاہد حامد سمیت آرمی میڈیکل کور کے حاضر اور سابق افسران بھی موجود تھے۔

افسران اور جوانوں سے ملاقات میں آرمی چیف نے دہشت گردی کے خلاف جنگ میں قیمتی جانوں کو بچانے کے لیے آرمی میڈیکل کور کے کردار کو سراہا۔

انہوں نے پاک فوج کے ساتھ ساتھ شہریوں کو صحت کی میعاری سہولیات فراہم کرنے پر ڈاکٹر اور پیرا میڈیکل اسٹاف کی خدمات کی تعریف کی۔

اس سے قبل ایبٹ آباد پہنچنے پر آرمی چیف جنرل قمر جاوید باجوہ نے یادگارِ شہدا پر پھولوں کے گلدستے رکھے اور فاتحہ ادا کی۔

متعلقہ خبریں