Daily Mashriq

نیب نے سابق وزیراعظم شاہد خاقان عباسی کو گرفتار کرلیا

نیب نے سابق وزیراعظم شاہد خاقان عباسی کو گرفتار کرلیا

ومی احتساب بیورو (نیب) نے سابق وزیراعظم اور مسلم لیگ (ن) کے نائب صدر شاہد خاقان عباسی کو لیکویفائیڈ نیچرل گیس (ایل این جی) کے اربوں روپے کے ٹھیکے دینے کے کیس میں گرفتار کرلیا۔

نیب نے شاہد خاقان عباسی کو تفتیش کے لیے طلب کر رکھا تھا لیکن وہ پیش نہیں ہوئے تھے اس سے قبل نیب نے انہیں 8 مرتبہ طلبی کے نوٹس جاری کیے جس میںسے وہ 5 نوٹسز پر تفتیش کے لیے پیش ہوئے۔

واضح رہے کہ مارچ میں سابق وزیر اعظم ایل این جی کیس میں نیب کے سامنے پیش ہوئے تھے، جس کے بعد احتساب کے ادارے نے ان پر سفری پابندی لگانے کی تجویز دی تھی۔

قبل ازیں 2 جنوری کو ای بی ایم نے اس وقت شاہد خاقان عباسی کے خلاف 2 انکوائریز کی منظوری دی تھی، جب وہ سابق وزیر پیٹرولیم اور قدرتی وسائل تھے، ان انکوائریز میں سے ایک ایل این جی کی درآمدات میں بے ضابطگیوں میں ان کی مبینہ شمولیت جبکہ دوسری نعیم الدین خان کو بینک آف پنجاب کا صدر مقرر کرنے سے متعلق تھی۔

تاہم شاہد خاقان عباسی کئی مرتبہ یہ کہہ چکے ہیں کہ انہوں نے ایل این کی درآمد کے لیے دیے گئے ٹھیکے میں کوئی بے ضابطگی نہیں کی اور وہ ہر فورم پر اپنی بے گناہی ثابت کرسکتے ہیں۔

نہ صرف شاہد خاقان عباسی بلکہ سابق وزیر اعظم نواز شریف پر بھی اپنی مرضی کی 15 مختلف کمپنیوں کو ایل این جی ٹرمنل کا ٹھیکا دے کر اختیارات کا غلط استعمال کرنے کا الزام لگایا گیا تھا۔

علاوہ ازیں نیب نے مختلف لوگوں کے خلاف 3 کرپشن ریفرنسز دائر کرنے کی منظوری بھی دی، جس میں پنجاب یونیورسٹی کے سابق وائس چانسلر ڈاکٹر مجاہد کامران پر قوائد و ضوابط کی خلاف ورزی کرتے ہوئے اپنے من پسند 454 افراد کی بھرتیوں اور انہیں اسکالر شپ دینے کا معاملہ بھی شامل ہے۔

اسی طرح این ٹی ڈی سی کے چیف ایگزیکٹو افسر طارق عظیم اور دیگر کے خلاف ریفرنس دائر کیا جائے گا، ان پر الزام ہے کہ انہوں نے ٹرسٹ سرمایہ کاری بینک میں غیر قانونی طور پر 20 کروڑ روپے کی سرمایہ کاری کی، جس سے قومی خزانے کو 16 کروڑ 58 لاکھ 60 ہزار روپے کا نقصان ہوا۔

نیب اجلاس میں اسلام آباد الیکٹرک سپلائی کمپنی کے سابق چیف ایگزیکٹو افسر جاوید پرویز اور دیگر کے خلاف ٹرسٹ سرمایہ کاری بینک میں 12 کروڑ روپے کی سرمایہ کاری کرنے پر ریفرنس دائر کرنے کی منظوری دی گئی۔

متعلقہ خبریں