Daily Mashriq

شکار پر پابندی کی خلاف ورزی

شکار پر پابندی کی خلاف ورزی


تحریک انصاف کے قائد عمران خان کے احکامات کو ہوا میں اڑا دینے والے رکن صوبائی اسمبلی نے شکار سندھ کے کسی علاقے میں کیا یا یہ خیبر پختونخوا ہی کا کوئی علاقہ ہے اس سے قطع نظر ان کی جانب سے اپنے چیئر مین کو شرمسار کرنے والا اقدام ضرور کیا گیا ہے۔ ہمارے تئیں سرکاری قوانین کی پابندی کے ساتھ شکار کرنا کوئی معیوب بات نہیں لیکن پرندوں کی نسل کشی روکنے کے لئے اس عمل پر ناقدین کی بات میں بھی وزن ہے۔ اگرچہ شکار کے عمل میں سیاست کو عمل دخل نہیں لیکن خود تحریک انصاف کی جانب سے قطری شہزادوں کی شکار کے لئے آمد کو جس انداز میں سیاسی بنا دیاگیا تھا اس کے تناظر میں کم از کم تحریک انصاف کے فاضل ممبر اسمبلی کو بالخصوص اور دیگر کو بالعموم محتاط رویہ اختیار کرنے کی ضرورت تھی تاکہ مخالفین کو پھبتی کسنے کا موقع نہ ملے۔ بعض اطلاعات کے مطابق صوبے میں مخصوص عناصر کو محدود پیمانے پر شکار کے پرمٹ جاری کئے جانے کی بھی اطلاعات ہیں۔ ممکن ہے یہ اطلاع درست نہ ہو اگر صوبائی حکومت ایسا کرچکی یا کرنے کا ارادہ ہے تو اسے مخفی رکھنے سے شکوک و شبہات بڑھنے کا اندیشہ ہے۔ اس لئے اس ضمن میں واضح پالیسی اختیار کی جائے تاکہ محولہ قسم کی صورتحال پیش نہ آئے۔

اداریہ