Daily Mashriq

'ایران کے ساتھ جنگ نہیں چاہتے لیکن دفاع کیلئے ہر پل تیار ہیں'

'ایران کے ساتھ جنگ نہیں چاہتے لیکن دفاع کیلئے ہر پل تیار ہیں'

امید ہے کہ ایرانی حکمران حکمت کا راستہ اختیار کرتے ہوئے عالمی سطح پر اپنی پالیسیوں پر غور کریں گے.

 سعودی فرمانروا شاہ سلمان کا کہنا ہے کہ ایران کے ساتھ جنگ نہیں چاہتے  لیکن دفاع کے لیے ہر پل تیار ہیں۔

 عرب نیوز کے مطابق سعودی شوریٰ کونسل سے خطاب کرتے ہوئے شاہ سلمان نے ایران پر زور دیا کہ وہ اپنے توسیع پسند نظریے کو ترک کردے۔

انہوں نے ایران میں جاری حالیہ پرتشدد مظاہروں کی طرف اشارہ کرتے ہوئے کہا کہ ایرانی پالیسیوں کے نتیجے میں اس کی اپنی ہی عوام کو نقصان پہنچا ہے۔

سعودی فرمانروا کا کہنا تھا کہ ہمیں امید ہے کہ ایرانی حکمران حکمت کا راستہ اختیار کرتے ہوئے عالمی سطح پر اپنی پالیسیوں پر غور کریں گے۔

شاہ سلمان کا کہنا تھا کہ عالمی برداری ایران کے میزائل اور ایٹمی پروگرام کو روکنے میں کردار ادا کرے،سعودی عرب اپنے دفاع کے لیے انتہائی اقدام اٹھانے میں ایک لمحہ کی تاخیر نہیں کرے گا۔

دوسری جانب سعودی وزارت خارجہ نے ایران کے 'فردا' جوہری پلانٹ سے متعلق امریکی مؤقف کا خیر مقدم کیا ہے۔

امریکا نے ایران کی جانب سے جوہری سرگرمیاں دوبارہ شروع کرنے پر 'فردا' جوہری پلانٹ پرپابندیوں کو دی گئی چھوٹ 15 دسمبر سے ختم کرنے کے اعلان کیا تھا۔

ایران میں پیٹرول کی قیمتوں میں اضافے کیخلاف احتجاج، ہلاکتیں 100 سے تجاوز

خیال رہے کہ رواں ماہ  ایران نے اقوام متحدہ کے جوہری انسپکٹر کا اجازت نامہ منسوخ کر تے ہوئے  فردا جوہری پلانٹ پر یورینیم افزودگی دوبارہ شروع کرنے کا اعلان کیا تھا۔

ایران میں پیٹرول کی قیمتوں میں اضافے کے خلاف گذشتہ 7 روز سے  مظاہرے جاری ہیں جن میں اب تک 100 سے زائد افراد کی ہلاکت کی اطلاعات ہیں

متعلقہ خبریں