Daily Mashriq

وزیراعظم کا بے نامی جائیدادوں کی رپورٹ ایک ماہ میں پیش کرنے کا حکم

وزیراعظم کا بے نامی جائیدادوں کی رپورٹ ایک ماہ میں پیش کرنے کا حکم

وزیرِ اعظم عمران خان نے ملک بھر کے تمام ڈپٹی کمشنروں اور ڈیولپمنٹ اتھارٹیز کے سربراہوں کو بے نامی جائیدادوں کی نشاندہی کرکے رپورٹ پیش کرنے کا حکم دے دیا۔

اس حوالے سے وزیراعظم آفس کی جانب سے تمام صوبائی چیف سیکریٹریز کو جاری کیے گئے مراسلے میں کہا گیا کہ تمام ڈپٹی کمشنر ایک ماہ میں اپنے متعلقہ علاقوں میں موجود بے نامی اور مشکوک جائیدادوں کی نشاندہی کرکے رپورٹ پیش کریں۔

مراسلے میں مزید کہا گیا کہ ڈپٹی کمشنروں کی جانب سے پش کی جانے والی رپورٹ میں نشاندہی نہ کی جانے والی بے نامی جائیداد سے متعلق بعد میں علم ہوا تو متعلقہ ڈپٹی کمشنر یا ڈیولپمنٹ اتھارٹی کے سربراہ کو ذمہ دار ٹھہرایا جائے گا اور متعلقہ افسر کے خلاف بے نامی قانون کے تحت کارروائی کی جائے گی۔

وزیراعظم آفس کی جانب سے تمام افسران کو 30 ستمبر تک فیڈرل بورڈ آف ریونیو (ایف بی آر) کے چیئرمین کو رپورٹ بھجوانے کی ہدایت کی گئی جبکہ وزیرِ اعظم آفس کو بھی اس رپورٹ کی نقل بھیجی جائے گی۔

مراسلے میں کہا گیا کہ بے نامی جائیدادوں کے حوالے سے 20اگست 2019 کو ہونے والے اہم اجلاس میں وزیرِ اعظم نے اس بات پر زور دیا کہ بے نامی جائیدادوں کی نشاندہی کے لیے فوری اقدامات کی ضرورت ہے اور اس ضمن میں صوبائی حکومتیں متحرک کردار ادا کریں۔

خیال رہے کہ فیڈرل بورڈ آف ریوینیو نے ایمنسٹی اسکیم کی مدت ختم ہوتے ہی بے نامی جائیدادیں ظاہر نہ کرنے والے افراد کے خلاف کارروائی کا آغاز کردیا تھا۔

واضح رہے کہ 14 مئی سے شروع ہونے والی اس اسکیم کا اختتام 30 جون کو ہونا تھا، تاہم حکومت نے اس کی مدت میں توسیع کا فیصلہ کرتے ہوئے اثاثے ظاہر کرنے کی آخری تاریخ 3 جولائی کردی تھی۔

حکومت نے بے نامی ٹرانزیکشنز ایکٹ 2017 کے تحت بے نامی جائیدادوں سے نمٹنے کے لیے لاہور، کراچی اور اسلام آباد پر مشتمل 3 بڑے اور 11 ذیلی زونز بنانے کا اعلان کیا تھا۔

بعدازاں ایف بی آر نے یکم اگست کو بے نامی جائیداد اور اکاؤنٹس کے خلاف کارروائی کے لیے ادارے میں ایک علیحدہ شعبہ قائم کیا تھا۔

خیال رہے کہ رواں برس جون میں وزیراعظم عمران خان نے بے نامی جائیداد کی نشاندہی کرنے والے افراد کو 10 فیصد کمیشن دینے کا اعلان بھی کیا تھا۔

متعلقہ خبریں