Daily Mashriq

'آئین میں عقیدہ ختم نبوت میں ترمیم یا خاتمے کا تصور نہیں'

'آئین میں عقیدہ ختم نبوت میں ترمیم یا خاتمے کا تصور نہیں'

وفاقی وزیر داخلہ بریگیڈیئر (ر) اعجاز شاہ نے کہا ہے کہ آئین میں عقیدہ ختم نبوت اور اسلامی دفعات میں ترمیم یا خاتمے کا تصور بھی نہیں کیا جا سکتا۔

پاکستان علما کونسل کے وفد سے ملاقات میں وفاقی وزیر داخلہ نے کہا کہ سیاسی مقاصد کے لیے مذہب اور فتوے کا استعمال افسوسناک ہے۔

اعجاز شاہ کہنا تھا کہ علماء کو فتنہ اور فساد پھیلانے والے عناصر کو بے نقاب کرنا چاہیے، اسلام کا نام لے کر سیاسی اور ذاتی مقاصد کے لیے فتوے دینے والوں کی حوصلہ شکنی کرنے کی اشد ضرورت ہے۔

انہوں نے بتایا کہ مدارس عربیہ کے مقام کو دیکھتے ہوئے وزارت تعلیم سے رجسٹریشن کا فیصلہ کیا گیا ہے۔

وفاقی وزیر داخلہ نے انتہا پسندی اور دہشت گردی کے خاتمے کے لیے علما اور حکومت کو مشترکہ جدوجہد پر زور دیا۔

اعجاز شاہ نے کہا کہ مدارس و مساجد کے مسائل کا حل اولین ترجیح ہے۔

اس حوالے سے پاکستان علما کونسل کےمرکزی چیئرمین حافظ محمد طاہر محمود اشرفی نے کہا کہ ملاقات میں عقیدہ ختم نبوت، مدارس اصلاحات، یکساں نصاب سمیت دیگر امور پر سیرحاصل گفتگو ہوئی۔

ان کا کہنا تھا کہ دہشت گردی اور انتہا پسندی کے خلاف سال 2000 میں پاکستان علما کونسل نے تمام مکاتب فکر کا مشترکہ فتویٰ جاری کیا تھا۔

انہوں نے کہا کہ سوشل میڈیا کے ذریعے نفرت پھیلانے والے عناصر کی سرکوبی کے لیے پاکستان علما کونسل حکومت کے ساتھ ہے۔

حافظ محمد طاہر محمود نے بتایا کہ مدارس کو وزارت تعلیم سے منسلک کرنا قابل تحسین عمل، حکومت کے مثبت اقدام کی توثیق ہے۔

علما کے وفد نے واضح کیا کہ غیرشرعی اور غیر آئینی اقدامات کا محاسبہ کریں گے۔

طاہر اشرفی نے کہا کہ حکومت عید الاضحی کے موقع پر مدارس و مساجد کو قربانی کی کھالیں جمع کرنے کےلیے این او سی میں سہولتیں پیدا کرے۔

انہوں نے وفاقی وزیر سے ملاقات میں واضح کیا کہ مدارس و مساجد کسی بھی انتشار اور فتنہ پھیلانے والی تحریک کا حصہ ہیں اور نہ ہی مدارس کوئی سیاسی ایجنڈہ رکھتے ہیں۔

متعلقہ خبریں