Daily Mashriq

اسٹیج ڈانسر عامر گوگی پر دوست نے گولیاں برسا دیں

اسٹیج ڈانسر عامر گوگی پر دوست نے گولیاں برسا دیں

ملتان: پنجاب کے شہر ملتان میں ایک اسٹیج ڈانسر عامر گوگی کو دوست نے گولیاں برسا دیں، جس کے باعث وہ جاں بحق ہو گیا۔

تفصیلات کے مطابق ملتان کے علاقے نظام آباد میں گھر میں فائرنگ کر کے اسٹیج ڈانسرعامر گوگی کو قتل کر دیا گیا، پولیس کا کہنا ہے کہ عامر گوگی پر اس کے دوست ہارون نے ساتھی کے ساتھ مل کر فائرنگ کی۔

پولیس کے مطابق گولیاں لگنے کے بعد عامر گوگی زخمی ہو گئے تھے جنھیں طبی امداد کے لیے فوری طور پر ملتان کے نشتر اسپتال منتقل کیا گیا، لیکن وہ جاں بر نہ ہو سکے۔

پولیس کا یہ بھی کہنا ہے کہ حملہ آور فائرنگ کرنے کے بعد موقع سے فرار ہونے میں کام یاب ہو گئے تھے تاہم قاتلوں کی تلاش جاری ہے۔ معلوم نہیں ہو سکا ہے کہ اسٹیج ڈانسر گوگی کو کیوں قتل کیا گیا، پولیس نے اس سلسلے میں تفتیش شروع کر دی ہے۔

یاد رہے کہ گزشتہ برس اگست میں گوجرانوالہ کے ایک معروف اسٹیج اداکار اکرم اداس پر قاتلانہ حملہ کیا گیا تھا، تاہم وہ بچ گئے تھے، لاہور سے گوجرانوالہ جاتے ہوئے ان کی کار پر موٹر سائیکل سوار ملزمان نے فائرنگ کر دی تھی، ایف آئی آر میں محفل تھیٹر لاہور کے پروڈیوسر اسحاق کو نامزد کیا گیا تھا۔

اس سے قبل ایبٹ آباد میں بھی مقامی اداکارہ اور ڈانسر نور کو سابق شوہر شازی خان نے ان کے گھر میں گھس کر قتل کر دیا تھا۔ اس طرح کے مزید واقعات بھی پیش آ چکے ہیں، گزشتہ نومبر کو پشاور میں رقاصہ سونیا کو اس کے دوست نے قتل کیا تھا، جب کہ رواں برس اگست میں سوات میں ثنا نامی ایک گلوکارہ اور رقاصہ کو ان کے بھائی نے چھریوں کے وار کر کے قتل کر دیا تھا

متعلقہ خبریں