ویب ڈیسک :خیبرپختونخوا فوڈ سیفٹی اینڈ حلال فوڈ اتھارٹی نے پشاور کے علاقے اشرف روڈ پر کاروائی کرتے ہوئے ایک کارخانے سے 5ہزار کلو سے زائد جعلی و مضر صحت جعلی چائے کی پتی برآمد کرلی ہے۔ کارخانے میں جعلی چائے کی پتی تیار کی جارہی تھی، جس میں چوکر، بورا اور چنے کے چھلکوں کا استعمال کیا جارہا تھا، ملزمان کو رنگے ہاتھوں دھر لیا گیا۔
فوڈ سیفٹی اتھارٹی کے مطابق یونٹ میں چائے کی پتی تیار کرنے کے دوران ملاوٹی اجزا کے ساتھ کپڑوں کا رنگ بھی استعمال کیا جارہا تھا۔ چائے کی پتی کی تیاری میں رنگ کاٹ کا استعمال بھی پایا گیا۔ یونٹ سے مضر صحت چائے کی پتی کے سٹاک کے ساتھ چوکر، بورا اور چنے کے چھلکے بھی برآمد کئے گئے۔
چائے کی پتی کو مکسنگ کے بعد سوکھنے کیلئے عمارات کی چھت پر گندے فرش پر رکھا گیا تھا۔ فوڈ سیفٹی اتھارٹی کے مطابق حفظان صحت کے اصولوں کی خلاف ورزی اور صفائی کی صورتحال بھی نہایت ناقص پائی گئی۔