بعض افراد کے آئین سے انحراف

بعض افراد کے آئین سے انحراف کی وجہ سے ملک مشکلات سے دوچار ہے، آصف علی زرداری

پیپلز پارٹی کے شریک چیئرمین آصف علی زرداری نے کہا ہے کہ کچھ افراد کے آئین سے انحراف کی وجہ سے ملک مشکل وقت کا سامنا کر رہا ہے۔
ویب ڈیسک: اپنے ایک بیان میں پیپلز پارٹی پارلیمنٹیرینز کے صدر آصف علی زرداری نے کہا ہے کہ 1973 کے آئین کی گولڈن جوبلی کے موقع پر قوم کو مبارکباد دیتا ہوں، آئین کے تحفظ کیلئے کسی بھی قربانی سے گریز نہیں کریں گے، قائد عوام ذوالفقار علی بھٹو شہید نے 1973 کے آئین کی صورت میں قوم کوتحفہ دیا تھا جو متفقہ دستور ہے، ہیروز کو سرخ سلام جنہوں نے آئین کی بحالی کیلئے عظیم قربانیاں دی ہیں۔
سابق صدر مملکت آصف علی زرداری نے مزید کہا ہے کہ آمریت میں جیالوں نے قربانیوں سے جمہوریت کیلئے جدوجہد کرنے والوں کو راستہ دکھایا، تمام سیاسی کارکنوں کو خراج عقیدت پیش کرتا ہوں جنہوں نے قربانیاں دیں، گڑھی خدا بخش بھٹو کا گنج شہیدان جمہوریت پرستوں کیلئے مینار نور ہے، 1973 کے آئین کی اصل صورت میں بحالی محترمہ بینظیر بھٹو شہید کی زندگی کا اولین مقصد تھا۔
سابق صدر آصف علی زرداری نے کہا ہے کہ اٹھارویں آئینی ترمیم کے ذریعے 1973 کا آئین اصل صورت میں بحال ہو چکا ہے، قوم اور ملک کے مستقبل کے فیصلے کرنے کا اختیار پارلیمنٹ کو دیا جائے۔

مزید پڑھیں:  عثمان ڈار کو مشروط طور پر عمرے پر جانے کی اجازت