ویب ڈیسک: آسٹریلوی شہر سڈنی کے شاپنگ سنٹر میں گزشتہ روز چاقو بردار شخص کے حملے میں شدید زخمی ہونے والا پاکستانی سکیورٹی گارڈ فراز احمد طاہر دم توڑ گیا۔
پولیس کے مطابق حملے میں مجموعی طور پر 6افراد جان سے گئے جب کہ درجنوں زخمی ہوئے۔
پاکستانی سکیورٹی گارڈ فراز احمد طاہر سڈنی کے رائل پرنس ایلفرڈ اسپتال میں زیر علاج تھا، تاہم وہ زخموں کی تاب نہ لاتے ہوئے جاں بحق ہوگیا۔
واضح رہے کہ ہفتے کو سڈنی کے مقامی مال میں ایک شخص نے شہریوں پر چھرے سے حملہ کیا تھا، واقعہ کی اطلاع ملنے پر پولیس موقع پر پہنچی تھی اور ملزم کو ہلاک کر دیا تھا۔
میڈیا رپورٹس کے مطابق سڈنی میں چاقو سے حملہ کرنے والا شخص ماضی میں ذہنی صحت کے مسائل کا شکار تھا اور اب تک کی تحقیقات کے مطابق شاپنگ سنٹر پر حملے کا کوئی مقصد سامنے نہیں آسکا۔
نیو سائوتھ ویلز پولیس کے اسسٹنٹ کمشنر انتھونی کوک نے ایک پریس کانفرنس میں بتایا کہ حملہ آور کی شناخت جوئیل کوچی کے نام سے ہوئی۔
حملہ آور کی شناخت کے بعد ریاست کوئنز لینڈ کی پولیس نے ہلاک ملزم کے اہل خانہ سے رابطہ کرکے ضروری معلومات حاصل کیں۔
