پاکستان تحریک انصاف کے جہانگیر ترین گروپ کے رہنما عون چوہدری نے کہا ہے کہ پنجاب کے وزیر اعلیٰ عثمان بزدار کو ہٹائے بغیر معاملات آگے نہیں بڑھ سکتے۔
تفصیلات کے مطابق رہنما ترین گروپ عون چوہدری نے جمعرات کے روز جاری اپنے بیان میں کہا کہ عثمان بزدار کو ہٹانے کے بعد ہی حکومت کے ساتھ مذاکرات نتیجہ خیز ہو سکتے ہیں۔ انہوں نے کہا کہ ان کے مذاکرات اب وزیراعظم عمران خان یا وفاقی ٹیم سے ہوں گے۔
یہ بھی پڑھیں: نواز شریف کی آزاد کشمیر میں بھی تحریک عدم اعتماد لانے کی اجازت
رہنما ترین گروپ نے کہا کہ ڈاکٹر مراد راس سے ملاقات میں جہانگیر ترین گروپ نے کوئی لچک نہیں دکھائی۔ انہوں نے کہا کہ وہ مائنس عثمان بزدار کے مطالبے پر کھڑے ہیں اور اس کے بعد ہی دیگر ایجنڈے پر بات چیت ہو گی۔
عون چوہدری کے مطابق جہانگیر ترین گروپ کے ارکان اور عثمان بزدار کے درمیان ملاقاتوں میں کوئی حقیقت نہیں ہے۔ انہوں نے کہا کہ بزدار اور ترین گروپ کی ملاقاتوں کی تصاویر پرانی ہیں۔ ان کا کہنا تھا کہ ترین گروپ جہانگیر ترین کی قیادت میں متحد ہے، ہمارا گروپ مشترکہ فیصلے کر رہا ہے۔
